Serê du beranan di beroşekê de nakele

Cemîlê Çargurçik-23/12/07-Stockholm- Dibêjin xwedîyê malpera Kurdwebbê Firat Aygun û serokê eşîra malpera Nefelê Arif Zêrevan dane ber hev û dest bi lotik û pehînan kirine.

Wek hûn zanin, Arif û malpera wî di şûna “ku” de “ko” bi kar tînin. Hinek alî li dijî “ko” derdikevin û dibêjin ku, li gellek herêmên Kurdistanê “ko” di şûna “ne tûj” de tê bikaranîn û ji ber vê jî zimanê Kurdî dike wek şorba nîskê. Mînak: “kêra ko, şûrê ko – kêra neseqandî-kêra netûjkirî”. Lê piranîya malperên Kurdan “ku” bikartînin ji ber ku “ku” naziktir, siviktir û bilêvkirina wê seksîtir e. Çawa ku zimanê Swêdî ji zimanê Fînlandî naziktir û nermtir e, “ku” jî ji “ko” kubartir e.

Werhasil, “ko” ya Arif Zêrevan jî wek zimanê Fînlandî ye, yanî gava tê gotin weke ku hinek mîrkutan li serê meriv bixin. Neyse,  “ku” be yan “ko” be, herdu jî ji Fransî “que” hatine dizîn. Ji xwe rehmetî Celadet Bedirxan gava li binxetê bû, Sûriye di bin destê Fransîyan de bû û ji ber vê jî bandora gramatîka Fransî li Kurdî bûye. Meselen li herêma Mêrdînê jî dibêjin “go”.  

Ez serê we neêşînim, ku be, ko be, çi jehr û ziqûm be bila bibe, hema gotina ku ji guhê meriv re xweş neyê ne xweş e.

Hema bi namûs, gotina “ku” wek Angelîna Jolîe, Scarlet Johanson û Pamela Anderson seksî, germik û nermik e. Lê gotina “ko” jî wek çêleka ku ga û ciwangeyên nav garanê tirr têde nehiştibin, çiryaye û diryaye ellawekîl!

Ê me em wek Lotikxane ji gotinên nazik, sivik, seksî û nermik hez dikin yabo! Gotinên ku bîhna sîr û pîvazê jê bên ji me re nelazim.............!