Cembelîyê Botî

LI  HEKARÎYAN ŞERÊ EŞÎRAN

Medîa Tirkan meselê aloz dike

Ev bûn sê roj in di medya Tirkan de dibêjin: “ Li Hekarîya eşîra Pinyanişîyan û  Silehîyan ji sedema revandina keçekê şer dikin”.

 Ez bi xwe jî endamek eşîra Silehîyan im. Revandina keçekê jî rast e. Lê şer ne li ser revandina keçikê ye û ne şerê Pinyanişîyan û Silehîyan e. Yên şerkirine jî beşek ji Pinyanişîyan navê wan Bilêcanî ne. Celeba din jî ne Silehî lê di nav Silehîyan de cihwar bûne. Ne ew hej Silehîyan dikin ne jî Silehî hej wan.

Baş e mesele çiye ?

Kurê pisê pismamê min û brazîya serekê şaredarîya Çelê hej ji hev dikin. Paşê keçik dest ji kurik berdide. Kurik bênamûsîyê dike û keçikê bi zorê direvîne.

Çelî doza şûndestendina keça xwe li Silehîyan dikin. Lê mezin ketine navberê û dixwazin sulha wan bikin. Heta niha çi şer û pevçûn çênebûne û mesela keçrevandinê wusan sekinî ye.

Em bên ser mesela şer.

 Piştî şerê qirêj gundên Çelê û eşîra Pinyanişîyan yên wek Bilêcanî, Talisî, Marûfî, Hêşetî, Deştanî û hwd mecbûr man hatin li Cûlemêrgê cihwar bûn û ji xwe re çend tax avakirin . Ji wan Bilêcanî mirovên gellek şûndemayî ne. Şol û karê wan pevçûn û şer in. Bi heceta xwîndarîya mirîşkekê  ereba xelkê jê distînin.  Lewre eşîrên Hekarîya jî ji wan re dibêjin “Apaçî “

Gellek ji wan bûne tefecî, 1000 panqunotan didin 50.000 an distînin. Ne li kuştinê ne jî li lêdanê ditirsin. 100 kes bi hevre dikarin li zarowekê  xin. Hemû eşîr û ûcaxên

( binemalên ) li Hekarîya hivza xwe ji wan dikin û di destê wan de el eman in! Mala Sebrî û mala Wehbî ( Şen’an ) du babikên biçûk û gelek dewlemend in. Ev bûn 60 sal in ticaretî û mutahîtîyê dikin. Otêl, ofîsên petrolê, apartiman, dikanên wan pir in. Tefecîyên Bilêcanîyan çav berdane malê wan. Kurê Salih Gezer ê Çelî ( ew jî Pinyanişî ye ) mîtahîtîyê dike. Pare ji tefecîyan standine û têkilîyên wî û Şenan yên ticarî bi hevre hene. Ji ba Şenan malzemên avahîyan dikire, bi wan re digere û belku ticarîyê jî dike.

Bilêcanî ji ber ku çav berdaye malê Şenan, çend caran çûne ji Şenan re gotine “Gezer bi we re digere, şîrîkê we ye. Divê hûn deynê wî bidin” û tehdît kirine. Wan jî gotîye “ew jî wek we Pinyanişî ye, ne kurê bavê me ye ku em deynê wî bidin. We pare dane kê herin ji wî bistînin”.

Ser hindê Bilêcanî radibin bi 400-500 kesan ji nişka ve êrîşê dibin ser dikanên wan û didin ber keviran. Di dikanan de mişterîyên wan jî hene.  Hinek mişterî û sê kesên Şenan yên li ber dikanên xwe ne, brîndar dikin. Bilêcanî dixwazin bi vê êrîşê Şenan mecbûr bikin ku bi çekan xwe biparêzin û çend kesên wan brîndar bikin, an jî bikûjin  da ku bişên doza xwînê li wan bikin û çend milyonan jibo xwîna xwe ji Şenan bistînin.

 Bapîrê zavayê min jî li dikana wan e. Dixwaze berevanîyê bike, lê li wî jî dixin. Ew jî dest dihilîne. Bi kurtî ne ji eşîra Silehîyan, ne jî malbata keçikê çi şer nekirîne. Lê doh ji ber ku Bapîr Silehî ye, Abdurahman Keskîn jî mezinek Silehîyan e, Bilêcanîyan camên bîroya Abdurehman şikandine.

Her wek ku tê zanîn, medya Tirkan derheqa bûyeran de înformasyonan ji hêzên asayîşê distînin. Ew jî înfarmasyonên provakatîf ( yên ji xwe re pilankirî didin). Li ser hindê Silehî li hev civîyane û eşîrên din jî Pinyanişî jî tê de, piştgirî dayinê.  Lê hêzên provakatîf yên di nav dewletê de, gava dîtîne wê lîstîka wan aşkera bibe, berî ku şer bibe ew tefecî parastine û milet ji hev belav kirine. Wusa xuya dike hêzên asayîşê xwestine Silehîyan û Pinyanişîyan bera hev bide, lê ku dîne hemû eşîr ( yên Pinyanişîyan jî tê de) li Bilêcanîyan xin û ji wê belayê xilas bin wê gûyê wan derkeve meydanê, pêşîya şer girtin.

Gelî xwedavanên Lotixanê, Ergenekon li ser kar e. Îhtimal heye ku li bajarên din jî eşîretan proveqe bikin da ku rojeva Tirkiye û Kurdistanê aloztir bikin. Îcar hay ji dek û dolabên xêrnexwazan hebin û neyên lîztîkê qurban...

25.12.2009- Cûlemêrg

Qeymeqam beg lotikek Kurdî avêt

Qeymeqamê Beytulşebabê Soner Karataşoglû, bi minasebata cejna qurbanê serdana malên Kurd dike û cejna wan pîroz dike. Piştre diçe nexweşxanê û serdana nexweşan jî dike, lotikekê li wan jî dixe. Karataşoglû dibêne ku zarokek ji malbata Seyitxan û Şîrîn re çêbûye, Zarok keçik e, Radibe zêrekî bi keçikê vedike û dê û bav pîroz dike.

Dêya zarokê Şîrîn xanim ji qeymeqam beg re dibê:“Qeymeqam beg, madem tu heta bi vir hatiye, hema ka navekî li keçika me jî bike û hew“.

Werhasil, qeymeqamê Tirk radibe lotikek Kurdî davêje û dibêje:“Hema bi sê telaqan ji navê Berfîn xweştir nav tuneye. Bila navê wê Berfîn be“ û navê Berfîn li keçika Kurd dike.

Piştî vê lotika qeymeqam, kêfa dê û bavê zarokê tê û radibin bi Kurdî dua ji qeymeqam re dikin, hêvî dikin ku xwedê teala li axretê 70-80 horîyên bihuştê bike qismetê Soner Karataşoglû û xurcika wî dagre.

 Ez serê we neêşînim, qeymeqamê Beytulşebabê Soner Karataşoglû navekî Kurdî li keçika Kurd kir û destek da rêdana demokratîk. Ez jî vê lotika sayin Karataşoglû pîroz dikim û dibêjim:“Wey hezar sermezinên wek Denîz Baykal û Bahçelî bi qurbana gunikên te bin“ û hûn sax….

30/11/09- Şernex

PITIKA BACAN

 Bacanên Dizê û xirabûna exlaq

Dizê gundek 35 km li jêra bajarê Colemêrgê, di gelîyê Tîtarê de ye. Ji qedîm de hemû Cûreyên fêkî û dikakên bajarê Colemêrgê ji wî gundî dihatin hilberandin. Bi gotinek din, kanîya jîyana Colemêrgê bû. Mirov ji tama dikak û fêkîyên wê têr nedibû. Xasma bacan û tirî. Her bacanek bi kêmanî 500- 700 gr giran bûn. Min bixwe bacanên ku 1200 gr bûn dîtîne, kirîne û xwarine.

Di wan deman de ne hormon hebûn, ne derman û zibilên kimyewî. Hemû tişt bi xwezayî bûn. Ne tenê dikak û fêkî lê  mirov, heywan, hewa jî xwazayî bûn. Mirovan direw, dizî, hîlebazî, gilîkirin û fesadî nezanîbûn. Hemû rast û dirust bûn. Mezinahî û biçûkahî hebû. Biçûkan qedrê mezinên xwe digirtin. Dahbe û heywanên kedî jî xwedî qarekterek xweristî bûn. Heta gelek mecbûr nebana, xisar nedidan hev. Bi kurt û Kurmancî; her tişt li gor qanûnên xwezayê bi rêkûpêk di nav lihevkirinekê, bi dilxweşî û bextîyarî bi rêve diçû.

Lê vî şerê qirêj û gemarî, li Hekaryan exlaqê xweristê, mirovan, heywanan, dikak û fêkîyan jî guhert.  Bi genên wan ve leyîst. Xwerist, mirov, heywan, fêkî û dikakan, hemûyan serê xwe xwariye û xisarê didin rûniştevanên xwe.

Axir, mesela me li ser bacanên Dizê bû.

Piştî van bûyeran û xirabûna exlaq; bacanên Dizê jî hatin guhertin. Niha bacanên wan bi zibil û dermanên kimyewî tên çandin. Bacan biçûk, tamar, xisardar û ji forma xwe ya xwezayî derketine û bûne tiştekî din.

Li gundê Dizê, li taxa Derav ê camêrek diçe nav parêzê (baxçê zerzewatan) xwe da ku ji bo tirşo bacanên mayî jêbike. Di nav bacanan de bacanek ji yên elametên qîyametê dibîne. Bacan dişibe pitikan (bebek). Bi xwe berî salekê li çîyayê Simbir gumgomokên bi bask û rengareng ku heta niha kesî nedîtî û bînayî jî hatibûn dîtin. De vêca hûn ji kerema xwe li vê bacanê binêrin û biryara xwe ya li ser xirabûna exlaq bidin.     

15/11/09- Colemêrg

Wêne: Hekarî Medya

Serpêhatîya Mesûd Barzanî û generalê Tirk

Li ser bext û namûsa fitne û fesadên bakur û başûr be, tê gotin ku di salên 1990 – 91ê de (dibe ku tarîx ne rast be) dewleta Tirkan qamyonek çek û sîlehan jibo Tirkmenan dişîne başûrê Kurdistanê.

 Pêşmerge wê qamyona çekên dewleta Tirkan digirin. Dibêjin General Ilker Başbûx jî wan deman li bakurê Kurdistanê berpirsê artêşa Tirkan bû. Jibo wan çekên ku hatine girtin xilas bike, diçe Hewlêrê kek Mesûd dibîne û doza dayîna çekan û berdana kesên girtî lê dike.

Kek Mesud jê re dibê: " Êêêê, we ew çek jibo kê dişandin?"

Îlker Başbûx: " Me jibo Tirkmenan dişandin ku xwe pê biparêzin”.

 Kek Mesud: " Hella hella, em hinde sal e şer dikin, Tirkmenan fîşekek jî li hember Sedam ne teqandine. Beşek mezin ji yên Tirkmenan bi me re nin. Vêcar niha hûn van çekan jibo çi ji Tirkmenan re dişînin cîgerim? Hûn dixwazin Tirkmen bi van çekan min bikujin, an jî şerê me Kurdan bikin? Heke Kurdek, Erebek, Farisek an jî ji miletekî din li Enqerê bi demançekê bê girtin, hûnê çi li wî kesî û çeka pê re bikin?"

Îlker Başbûx dibê: " Ma tu Enqerê û Hewlêrê tînî rêza hev qardaşim?"

 Kek Mesud: " Nexêr ez naynim rêza hev. Dema Hewlêr navenda medenîyetê bû, ava û hukum dikir, hûn hêj li Asya Navîn li ser pişta hespan we şîr û goştê hespan bi xavî dixwar. Dê rabe here, em ne mirovên we berdidin û ne jî çekan didin”. 

Îcar hûn niha fêhm dikin bê jibo çi Başbûx û artêşa Tirk ewqasî ji Mesûd Barzanî aciz in gelî xwendevanan?

09/11/09- Colemêrg

Adiyaman tirr ji meselê berda

Cembelîyê Botî- 01/09/09-Colemêrg-  Kuro ku ne serokeşîr û mîr û begên me meselê safî bikin û dilê me rehet bikin, xêr ji van zimandirêj û zirtik virtikên din dernakeve. Aha li boxê beranan, li gunikreşê Kurd û serokê eşîra Jîrkî Mehmet Adiyaman binerin bes e.

Mehmet Adiyaman, serokê eşîra Jîrkîyan e. Erê eşîra Jîrkî piştî salên 1980î ji mecbûrî  bûn cerdevan û gunehê PKK jî di cerdevanbûna wan de hebe jî, lê eşîrek Kurd e, Kurdewar e û di dema xwe de qûn li dewletê diqetand, eskerî ji dewletê re nedikirin û bi Kurdayetîya xwe serbilind bûn. Lê xuyaye carna şert û mercên herêmê tên guhertin û mirov jî mecbûr dimîne yan mecbûr tê hiştin ku helwesta xwe li gora şertên heyî deyne.

Axir canim, mijara me ne li ser cerdevanîya eşîra Jîrkî bû, li ser heêwest û gotinên Mehmet Adiyaman bû.

Mehmet Adiyaman, da zanîn ku ew wek eşîreta Jîrkî piştgirîya avêtina gavên demokratîk û çareserkirina pirsa Kurd dikin û destekê didin Kasimpaşalî Receb. Adiyaman helwestek tund (hişk) raberî serokê partîya CHP Denîz Baykal û serokê segên Tirkiyê Devlet Bahçelî kir û got:“Dev ji qan qûnekan berdin, ew bi kêrî pîvazek xerabe nayên. Bi sê telaqên jinberdanê, ev mesele bi Apo (yanî Ocalan lo) re di nava nava pênc deqîqeyan de çareser dibe lo, wîî!“ û da bin dûvê Denîz Baykal û Devlet Bahçelî.

Werhasil,  Mehmet Adiyamanê ku serokê eşîra Jîrkî ye, serokê cerdevana ye û heta niha zêdeyî 1.500 endamên eşîra xwe di şerê PKK de winda kiriye, berê çareserîya pirsa Kurd dide Îmralîyê û dibêje ku Ocalan kare vê pirsê di nava pênc deqîqeyan de safî bike. Yanî, DTP û generalên wê ne tenê ne ha, va cerdevan û serokeşîr jî girava Îmralîyê dikin qibla çareserîyê pirsa Kurd.

Axir, Mehmet Adiyaman di derhe           qê Denîz Baykal û Devlet Bahçelî de dibêje:“Ew ji Erdogan dihesidin, ew qûnek di meclîsê de ji leqleq û çirt û virtê pêve tu gûyekî din naxwin, bi şeş telaqan ew nikarin şivantîya gundekî jî bikin“ û daye bin dûvê herdu sermezinên dolheram.  

Mehmet Adiyaman, bi dûdirêjî behsa DTP û roka Ocalan dike û dibê:“De dev ji Ahmet Turk û Emîneka me berdin looooo, xêr di wan de tuneye babam. Ne aştî bi wan çêdibe û ne karin aştîyê bikin. Derîyek li meydanê heye û heta bi mişk û pisîkan jî zanin bê mifta vî derî li ku ye û di destê kê de ye (yanî mifte di destê Ocalan de ye û ew jî li Îmralîyê ye).  Ez pêşniyaz dikim ku Ocalan serbest bê berdan, bibe serokê DTP û ev sêwlek mêwlekên ku hesbekqeder bûne siyasetmedar, herin ber golik û berxikan“ filan û fîstan.

Ez serê xwe û we neêşînim, Mehmet Adiyaman dibêje ku li Tirkiyê 25 milyon Kurd dijîn, ew kesên ku derketine serê çiyê jî zarokên vî milletî ne, ev 25 salin ku me û dewletê nikarîbû wan biqedînin û êdî divê çareserîyek ji van lotikan re bê dîtin.

Mehmet Adiyaman, mêrê çar jina ye (Bavê Teyar jî derbas kiriye law), 42 zarokên wî hene û û kêf kêfa wî ye. Aha carna jî lotikên wilo xweş davêje derûdorê.

Ma ka ji vê xweştir bavê min? Mêrê çar jinan, xwedî eşîr û pere, 42 zarok (42 jî bi rê de ne înşelleh), hewa pakij û li serê çiyayên Kurdistanê. Pekkkkkkkk, aha cinnet û bihuşt ji vê re tê gotin ellawekîl. Tew ku îcar Mehmet Adiyamanê me bibe wekîl û têkeve meclîsa Tirkiyê, ma êdî şûr simbêlê wî dibirre?

Neyse, henek menek li alîyekî, lê Adiyamanê me lotikên xweş avêtin û xuya bû ku ew kare 101 siyasetmedarên wek Xelo û Celo ji bêrîka xwe derxe û hûn sax…..

Ev lotik ji şorba nîskê jî xweştir bû

Cembelîyê Botî- 29/04/09-Colemêrg- Vê heyamê tofan û  firtone li ser serê endamên DTP rabûye û hema bêjin ji jenosîda Ermeniyan xirabtir hatiye serê wan. Sermezinên demokratîk cimhûrîyetê ha ha lotik û pehînan li Kurdan didin û qûndaxên keleşkofên xwe di serê zarokên Kurdan de dişkînin.

Welhasil, ez dibêjim ji alîyekî ve ev lotik û zîtirkên dewletê baş in çunkî ne wilo be em Kurd biaqil nabin, xwe û dijminê xwe nasnakin û emê sînorekî nexin navbera xwe û wan. Yanî, heta serê me li kevir nekeve aqlê me nayê serê me.

Dibêjin wekîla DTP a Ixdirê Perwîn Bûldan, doh-pêr di mitîngekê de lotikên Kurdewarî avêtine û daye navê. Bûldan, girtina endamên DTP û operasyonên li dijî DTP şermezar kiriye, qûna dewletê dax daye û tilî avêtiye bin dûvê wan. Bûldana me tiştek di dilê xwe de nehiştiye û ji kezebê axivî ye.

Welhasil, Perwîn Bûldan xanim behsa serketina hilbijartinên 29ê Adarê kiriye, navê „Kurdistan“ê ji ser zimanê xwe nexistiye û gotiye „Me bajarê Wanê stend, me ixdir steng, me sînorê Kurdistanê kifş kiriye“. Li ser van gotinên Bûldanê, sermezin û pozmezinên çapemenîya Tirko dîsa wek berê rabûne tapana, paşpaşkî dest bi lotikan kirine û weke ku kermêş bi wan vede, ziryane.

Ez serê we neêşînim, Perwîna me lotikek xalis muxlis Kurdewarî avêt û navê Kurdistanê di dil û kezeba xêrnexwazan de çikand. Piştî ku derbê ciyê xwe zeft kir û pêve, kî dizirre kî tirr û fisan dike ji xiyarê Ehmed Tirk ve û hûn sax…..

Bijî xaltîka Perwîn Bûldan bijî!

Bi sê telaqan ev lotika te ji şorba nîskê jî xweştir bû û hew….

KUTÊLA  HIRÇÊ

Li gundek bi navenda Cûlemêrgê ve girêdayî, cerdevan kutêlek (têjik-kudik ) hirçê

di nav daristanê de dibînin û tesîmî polîsên pira Depînê dikin. Ew jî wê kutêlê dibin daîra daristanê û didin midûra wê Ayşe xanimê.

Ayşe xanim kutêlê dibe ba beytar miayene dike. Li gor Eyşe xanimê, tendirustîya wê başe û çarmehî ye. Ayşe xanim wê bi bîberonê xwedî dike û kirîye endamê eşîra Guloyîyan.

Eyşe xanim dibê ku mezin bibe û bişêt xwe xwedî biket, ewê kutêlê berdin nav  xwezayê.

Vêca hûn dibînin bê cerdevanên Hekarya çend dilbirehm in. Zaroyên hirçan jî nakujin, xwerist û heywanetan jî diparêzin.

Xwedê xêra wan mezin bike. Bila hirçên Cûlemêrgê yên dupê bi qurbana wê kutêla  delal bin û zêdebûna eşîreta Guloyîyan li ser xêrê be.

Ma wê tenê Amerîkî û Ewropî pesnê hirçên xwe bidin qerdeşim, ma Cûlemêrgî ji wan kêmtir in?

17/04/09

ŞAKIRO Û ŞAKÎRA

 Cembelîyê Botî-31/12/08-Colemêrg-

Bav û bapîrîn me dibêjin: “Dinya bi dorê ye ne bi zorê ye”. Berê me di TRT ê de carnan  guhdarîya reqase û dengxweşa Amerîkî Şakîrayê dikir. Û dilê me bi me disot. Me digot: "Ji boy çi yekek wek Şakîra Amerîkanî di TRT ê de bi Îgilîzî stranan dibê,  û em 900 salin bi wan Tirkan re bi hevre dijîn çima dengbêjên wek Şakiro Kurdî nabêjin".

 Lê doh min li malê TRT 6 da eyarkirin û hinekî lê temaşe kir. Stranên Eyşe Şan  yên Şakiro û Rojînê guhdarî kir. Li gor min, herçend  80 salan direngî mabe jî, lê li Tirkîyê jibo me Kurdan şoreşek ziman e.  Ji ber ku qebûlkirina zimanê Kurdî û di vebûna kanalek dewletê de bi Kurdî û nîvîsarên bi tîpên Kurdî ji 80 salan berjortire ji alîyê  dewleta Tirkan de dihat înkarkirin. Kurd tune dihatin hesibandin.Bi xwe dewleta Tirkan bingeha xwe li ser van tiştan danîbûn. Bi vê kiryarê dewleta Tirkan bingeha xwe, (hîmên xwe) yên Kemalîzmê û dewleta xwe herifandin û binpêkirin. Lewre jî di welatek wek Tirkîyê de ku Kurd bi sedemê axaftina Kurdî dihatin lînçkirin, bûyerek weha jibo me wek destpêka şoreşekê ye. Bi vê bûyerê dewleta Tirk jiberkirinên xwe yên vir, direw, înkar û qetlîamên 80 salan li ser me Kurdan kirî, bi awayek vekirî qebûlkirin. Û li miqabilê dinyayê rûreşîya xwe aşkera kirin. Lê ev destpêke bi gotinek din hêj “ Lê lê ye û Lo lo jî wê pêra bêt “.

 Lê mixabin hinek sazîyên ku xwe Kurd dihesibînin heta niha bi dehan mitîng û meş di bin dûrişima EM ZIMANÊ XWE DIXWAZIN  de amade dikirin, îro li dij vê bûyera dîrokî derdikevin. Û kesên dixwazin di vê kanalê de kar bikin, wek xwefiroş û xayîn bi nav dikin.

 Başe heke ew kesên di kanala Kurdî ya TRT ê li ser ziman û çanda Kurdî dixebitin xwefiroş û xayîn in,  ma yên jibo çand û ziman meş çêdikirin nabin xwefiroş û xayîn? Madem xayîntî ye, we bo çi ewqas meş dan çêkirin, kurên baban dan kûştin û birîndarkirin? Heke ne xayînîtîye hûn bo çi li dij derdikevin? Tirk ziman qedexe dikin hûn dibên bo çi qedexe dikin. Kanalên Kurdî vedikin hûn dibên bo çî vedikin. Xuyaye hinek alî dîsa tevlihevîyan dixwazin û berjewendîyên wan di tevlihevîyan de hene. Wer xuya dike Tirkan projeyên we serûbin kirin û ew jî li we xweş nayê . Lê ez di wê bawerîyê de me, wê pîştî çend salan hunermendên bi we ve girêdayî jibo ku bişên bikevin TRT 6 ê wê bikevin rêzê û dorê. Wî çaxî emê hev bibînin.

Ne heweceyî zêde dirêjkirinê ye. Bila TRT 6 li ser xêrê be. Me Şakiro jî wek Şakîra di TRT ê de dît û dilê me wê êdî di wî warî de nesoje. Bi vê wesîlê  sala hemû xebatkarên Lotikxanê û ya hemî Kurdan bi dil û can pîroz dikim. Hîvîdarim wê sala 2009 an bibe sala xweşî, geşî, aşîtî û rabûna neheqîyan.

            BÛSH Û MIKAÎL

OBAMA Û SEÎDÊ MIFTÎ

Cembelîyê Botî- 10/11/08-Colemêrg-

Serkeftina Obema li tevahîya cîhanê wek şoreşkê hat nirxandin. Her welat li gor berjewendîyên xwe, wî pîroz dikin. Nameyên pîrozbahîyan jê re dişînin û hîvîya çareserîya pisgirekên xwe jê dikin.

Van qewimandinan ez birim 45 sal berî niha. Li bajarê Colemêrgê du federesyonên  eşîran hene. Ev herdu federesyon, di hilbijartinan de namzetên xwe datînin û jibo serkeftina wan çi ji destê wan bê nahevişînin. Namzetê serokatîya bajêr, yê baskê çepê Mikaîl îlçîn; yê baska rastê jî Seîdê Miftî bû. Mikaîl du dewran serokê şaradarîyê bû. Cara sêyan xwe sist kir û zêde propoxanda xwe nedikir û binve binve jî digote hinan „ dengên xwe bidin Seîdê Miftî“.

 Di hilbijartinên sêyem de Seîdê Miftî bi serket (bi gotinek din Mikaîl bi zanistî bi dest wî ve berda)

Hinek kesên berpirsên baskê çepê ji Mikaîl re gotin: „Te bo çi şaredarî bi dest baskê rastê ve berda?“  Mikaîl ji wan re got: „Min şaredarî heta qirikê deyndar kiriye. Di qasê de yek qirûş tune ku dema kurê Miftî aciz be, derxe û pavêje ser masê jixwe re pê bilîze“.

 Li gor bawerîya min, teqtîk û stratjîya Bûsh jî wek ya Mikaîl e. Tiştê Bush anî serê Obama ji ya Mikaîl anî serê Seîdê Miftî xirabtire û hûn sax. 

Paşê nebêjin Lotikxanê em şîyar nekirin û hîvîyên me bi avê de çûn haaa...

Guhê Arsalan bikşîne mamoooooooo!

Cembelîyê Botî- 06/11/08- Colemêrg- Dibêjin endamê Polît Buroya YNK kak Arsalan Baez lotikek ecêb avêtiye û piştgirî daye hikûmeta Erdoganê sermezin. Çi balkêş e, Erdogan li Colemêrgê tehdît dike, wan ji welatê wan diqewirîne, û Arsalanê me jî piştî demek kurt piştgirîya Erdogan dike û dixwaze Kurd kurtanê AKP li xwe kin.

Arsalan Baez bal kişandiye ser têkilîyên navbera Tirkiyê û herêma Kurdistanê û gotiye ku „pêşketinên li Tirkiyê û xelatdayîna nivîskar Yaşar Kemal jî“rûpelek nû ji bo Kurdan” e,  helwesta serekerkanê artêşa Tirk Îlker Başbûg gavek nû û xalek radîkal e“.

Arselanê kakaciyan gotiye:““Divê Kurdên li Tirkiyê û Iraqê ji vê fersenda dîrokî sûdê wergirin û hikûmeta Erdogan destek bikin. ” filan û fîstan.

  Hella hellaaaa ya siphan ella!

Yaw kaka ciyan, ma Kurdan piştgirîya hikûmeta Kerdogan nekir? Belê! Erdogan ne bi rayê Kurdan bi ser ket? Belê! Êêêêê? Erdogan ji Kurdan re çi kir? Înkar kir, kujtin kir, talan û wêran kir, ma çi kir û çi nekir kaka!

Naxwe ji bo çi tu dixwazi Kurdên bakur dîsa bibin kurtanê kerên AKP û Erdogan canekem?

Yaw mamooooooooooo, tu li kuyî?

Dev ji xwarina goştê elokan berde em qurban, guhê Arsalan bikşîne guhê wîîîîîîîîî!

Sermezino vê carê bê şerm xwe eşkere kir

Cembelîyê Botî- 03/11/08- Colemêrg- Bila Kurd xwe nexapînin û xwelîya Erdoganê sermezin li serê xwe û bavê xwe nekin. Çawa ku mişk û pisîk dijmin in, çawa ku gur dijminê pez e, çawa ku erd û ezman ji hev dûr e, em û Tirk jî dijminên hev in û ji vir heta bi er’s ji hev dûrin û xelas!

   Serokwezîrê Tirk Kasimpaşalî sayin sermezin Erdogan, li Colemêrgê lotikên paşûpê avêtin û bê şerm çend tirr û fiss kirin. Erdogan dîsa dest bi çîrokên axirzemana kir û  behsa „yek dewlet, yek al û yek millet“ kir û xwelî li serê Kurdên ku dane dû wî kir. Tew mêro li wê jî nesekinî û got:“Lan Colemêrglîler, oxlim, heçê li dijî a la me derkeve, bila siktir bibe û ji vî welatî bicehime“ filan û jehr û ziqûm.

Hûn Erdoganê qaşo misilman û xwedî edalet dibînin newlo?

Ûlan oxlim, ewladin, te xirrê kalkê min Şemo xwaro, tu kê ji welatê kê diqewirîni lan? Min di ala te de mîzto erê welle, tu hatiyi welatê me û dixwazi berdi me haa! Ê de tirrrrrrrrrrr li bin qûna te haaaaa!

Fermana Çêlekan

Cembelîyê Botî- 14/10/08-Cûlemêrg-

Cîhgirê Serokê Şaradarîya Cûlemêrgê  Îsa Bor  biryarek radîqal wergirt û fermana çêlekan rakir.  Îsa Bor Teblîx ji muxtarên taxan re şandîye û gotîye: “Xeberê bidin xwedîyê çêlekan bila çêlekên xwe bernedin ser gelêşan” û di  fermanê de nivîsîye  “sayin çêlek sehîplerî, her kim çêlekinî kulîfek û gelêşlere gonderîyor, heqin de ziritil wereqesî yapilacaxtir” ( heçê çêlekên xwe bişîne ser gelêşê wê bê cezakirin ).

   Mêro didomîne û dibê: ”Çêlekên ku li ser gelêş û kulîfekan bên dîtin, di bin qonturola beytar de wê bên serjêkirin û goştê wan ji feqîr û jaran re bê belavkirin. Paşê jî xwedîyên wan bên cezakirin”.

   Mirov dibê qey Îsa axa ne li Cûlemêrgê lê li Parîsê dijî. Ma di wê Cûlemêrga derdorên wê bi çîyayan zeftkirî de cihê çêrê heye ? Ma Îsa axa nizane her çêlekek malekê xwedî dike? Tevahîya sermîyanê wan ew çêlek e. Ma qey serokên şaredarîyên berê ker bûn an nezanbûn ku dengê xwe nedikirin? Yan tu dixwazî bi kuştina çêlekan bibî qehreman?

    Başe ku tu cihgirî û ne serokî. Heke tu bibî serok tuyê mirovan jî bidî serjêkirin ellawekîl! 

Lê ji bîr neke qerdeşim, heke tu çêlekan serjê bikî; wê xwedîyê wan çêlekan jî guhê te jêkin. Û dîsa  ji bîr neke,  rêxistinên heywanparêzan ne razayî ne. Ewê mala te xurab kin. Berê te bidin gundê te Marînis  û  te bişînin ber garana gund.

Paşê nebêje Lotikxanê  ez şîyar nekirim sayin çêlekkuj!