Lotikxane    

           <<  Magazîn, henek, gilî û gazin  >>

Kitêbeke nuh a zarokan!

DERGÛŞ

Dergûş her rûpelê wê bi nivîs û wêne ye ji 138 rûpelan pêk tê.

Hostayê DERGÛŞÊ, Deydikan, Hêlanan û hemiyan Laleş Qaso di pêşgotina kitêbê de wilo dibêje:

Dergûş kitêbeke ku ji bo zarokên temenê wan ji 6-7an dest pê dike û hetanî ku digihê 10-12an amade bûye. Lêbelê ez di wê bawariyê de me ew ê bi kêrî keç û xortên ku kurmanciya wan qels be jî bê.

Dergûş bi armanca ku hilfa zarokan here ser kurmanciyê û kurmancî bi wan şêrîn bibe, hatiye nivîsandin. Ji ber ku teyr û tilûr, pez û dewar û gelek tiştên di vê biwarê de bala zarokan dikişand, min jî ew tişt bi haweyê lihevanîneke ku zarok car carê pê bikenin him rave kiriye û him jî berê wan û dê û bavan xistiye hev ku dê û bav bi xwe jî baştir hînî kurmanciya xwe bibin.

Dergûş ne bi rengê ku bi destê pêşî re zarok bixwînin, ji bo ku dê û bav yan jî mezin ji wan re bixwînin hatiye nivîsandin.

Di kitêbê de, bi sebeba ku min dixwest ez bala zarokan bikşînim ser zimên û lihevanînê strankî têxim guhên wan, ji bêgavî ez derketime derveyî hin qayideyên gramerî. Nimûne:

Navdêrên ku bi pirhejmariya xwe di dawiya ristê de bi “n” diqediyan, ji bo ku ziman ji herk û teqla xwe nekeve û deng bi zarokê xweş bê, min hemû avêtine. Li aliyekî hetanî ku ji dest min hatiye ez ji tewanga navdêrên “nêr” reviya me û li aliyê din jî navdêrên “mê”, di tewanga xwe a yekhejmariyê de “ê”ya ku diva bû hatibaya dawiya wan, min bi kar ne aniye.

Bi hêviya ku dê û bav bi vî zimanê me ê ku rastûrê bi hebûn û nebûna me a miletî ve girêdayî ye bi zarokên xwe re bipeyivin, xwendina kurdî bi wan şêrîn bikin û tu carî ji bîra nekin ku gava ziman ji neslekî derbasî neslê din nebû, ziman winda dibe! Û bi windakirina zimên re jî hemû tiştên mirov winda dibin!   

Laleş Qaso

Tîrmeh 2007

---------------------------------------

Hûn karin dergûşa xwe ji navnîşanên jêr jî bixwazin.

Têkilî: Lotikxane

lotikxane@hotmail.com

info@lotikxane.com