Şekir ji lêvan dibare

Lêvzan- 09/07/08- Florîda-Dibêjin Şîrketa Înternetê "TV One" ankêtek çêkiriye û 10 jinên esmer û çîkolatayî hilbijartine. Tabî serê hefsêr lotikvana xwînşîrîn û lêvşekirî Halle Berry kişandiye. Berry xanim yekemîn derketiye û xwendevanan ew wek "şîrîna ber dilan" hilbijartiye.

  Li ser vê xeberê, me xwe gihand Berry xanimê û me sedema hilbijartina wê jê pirsî.

  Ciwanikê dilê me nehişt, derîyê xwe ji me re vekir û rêzek mezin da Lotikxanê.

Werhasil, xanimê got: "Helbet di nav esmer û qemeran de a herî şîrîn û germ ez im. Ez wek çîkolata bi şîr im. Tama ramûsanên min ji mewîjên Hibabê, ji penîrê sîrik ê Colemêrgê, ji tirî û bastêqa Mêrdînê, ji îsotên Ruhayê û ji sêvên Meletê xweştir û lezîztir in. Awirên min ji tîr û kevanên Robîn Hood, ji gurz û mertalê Ristemê Zal û ji şûrê Elîyê Şêr dijwartir in. Sîng û berên min ji zebeşên Diyarbekrê, ji petîxên Midyadê û ji pirteqalên Israîlê mezintir û tamdartir in. Lotikên min ji pehînên kerên Şamî, ji zîtirkên qantirên Cizîrê û ji mîkutên deşta Sirûcê bihêztir û xerabtir in. Ma ev taybetmendî li cem kîjan esmerê hene? Ma ez neyêm hilbijartin wê kîjan kezîkur bê hilbijartin ez bi qurban?" filan û fîstan.

Werhasil, min bi xwe jê bawer nekir. Li ser şika min, xanimê derî li min û xwe xilqand, xwe şût û rût kir û got: "Va şar û va mişar, Şam dûr e ma mişar jî dûr e! Heger tu bawer naki keremke biceribîne" û bi qerpika stuyê min girt ez kişkişandim nav nivînê.

Îcar encama lêkolîna min jî hûn texmîn bikin gelî xwendevanan!