Zêdeyî 20 sala ye pirtûkên Kurdî difroşe

Zinar Qelemşûr

Xortê ji Dêrika Çiyayê Mazî, qeraseyê zilaman, xalê me Selahattîn Bulut, zêdeyî 20 sala ye ku tenê pirtûkên Kurdî difroşe û parêzvanîya pirtûkên Kurdî dike.

Selahattîn Bulut, piştî ku di 1989an de ji zindana Diyarbekirê derdikeve, ji karê xwe yê mamostetîyê tê dûrxistin û dest bi firotin û parêzvanîya pirtûkên Kurdî dike. Di sala 2000an de li Beyoglû ya bajarê Stenbolê, di pasaja Elhamra de bi navê Pirtûkxaneya Medya pirtûkxaneyek piçûk vedike û tenê pirtûkên Kurdî difroşe. Helbet armanca wî ne qezenckirina peran e. Ji xwe zehmet e ku meriv ji pirtûkên Kurdî peran qezenc bike. Ew bi vê keftelefta xwe dixwaze xwedî li pirtûkên Kurdî derkeve, wan pirtûkan bigihîne xwendevanan û xwendina pirtûkên Kurdî li ber çavê xwendevanan şîrîn bike.

Selahattînê me di vî karê xwe de gelek caran ji alî polîsên dewleta Tirko ve hatiye tehdîtkirin, binçavkirin û gef lê hatine xwarin. Lê ewî terka firotina pirtûkên Kurdî nekiriye û xwêsîya polîsên Tirk di qirika wan de hiştiye.

Xalê me Selahattîn Bulut niha 64 salî ye. Lê bi vî temenê xwe jî dergevanî û parêzvanîya pirtûkên Kurdî dike û wan digihîne xwendevanên Kurd. Bê westan dixebite. Pirtûk bên firotin, neyên firotin, jê re ne xem e. Xema wî û merama dilê wî tenê vekirina Pirtûkxaneya Medya ye, dergevanî û parêzerîya pirtûkên Kurdî ye. Xalê me Selo û pirtûkên Kurdî bûne destebrakên hev. Ne ew bêyî pirtûkên Kurdî dibe, ne jî pirtûkên Kurdî bêyî wî dibin. Ji hev re bûne destebrak û hevalên dinya û axretê, wek şîrêzê bi hev ve zeliqîne û kesek nikare wan ji hev veqetîne..

Xalê me Selahattîn Bulut bi tenê nehêlin Kurdino!

Car caran serdana wî û pirtûkên wî bikin û çayek wî vexwin, wî bi tenê nehêlin kezebno..

Stenbol

About The Author