Pîrkemal
Em Kurd bûne wek goka nav lingê Maradona, Ronaldo û Messî, heçê tê pêhnekê li me dixe û li me siwaar dibe. Kurdên ku milletekî qedîm û resen e û dê û bavîtî ji milletên dinyayê re kiriye, îro koletîya xelkê dikin û hefsarê xelkên biyanî dixin stuyê xwe. Nizanim ne ji nezanîya me ye, ne jî ehmeqîya me ye, ne jî ji xwelîserîya me ye. Tiştê ez zanim heta em ev xwelîser û xeşîmên êqil bin, wê hê qelek bahoz û tofan li serê me rabim.
Ev 40 sal in em Kurdên Bakur bi qeyûman tên birêvebirin. Tirk û Ereb, çep û Alewîyên Kemalîst bûne serok û rêberên me û li ser ked û xwîna me dijîn. Doh jî wilo bû, îro jî heman tirşik û şorbe ye. Wê Kurd kedê bidin, xwînê bidin, bên kujtin, bên girtin, û wê Tirk û Ereb bi paraşûtê dakevin û bibin serokên me. Ev qeyûmên ku bi navê bratîya xelk û ummetê û ji alî dewletê ve dibin serok û rêberên me, Kurdan wek pez û garana gund bi kar tînin, hem şivantî û hem jî gavantîyê dikin. Ji ber ku em Kurd jî ji şivantî û gavantîya xelkê hez dikin û qîma xwe pê tînin, berê me bidin ku, me di lat û zinaran werkin jî em dengê xwe nakin.
Axir..
Yek ji wan qeyûmên ku bi paraşûtê danîne ser sere Kurdan jî Hevseroka DEMê û Ereba bajarê Hatayê Tulay Hatimogullari ye. Wek Ertugrul Kurkçu, S. S. Onder, Sezaî Temellî û bi sedan kesên ku bav û bavpîrên wan Kurd qetil kirine, îro serkêşîya me Kurdên xwelîser dikin û şivantîyê ji me re dikin. Evên ku bi navê çepîtî û bratîya Kurd û Tirkan hefsarê Kemalîzmê dixin stuyê me, êdî pêwistîyê bi veşartin û sergirtina hest û helwesta xwe, hişmendî û armanca xwe nabînin, di bin perda siyasetê de rasterast neyartîya ku bi Kurdan re dikin dibêjin û eşkere dikin. Lê xwelîserên me dîsa jî fêhm nakin û wek kerîyên pez didin dû wan û ji wan re li çepikan dixin.
Piştî ku dewletê qeyûm danîn ser şaredarîyên Mêrdîn, Êlih û Xelfetê, yanî, li şûna qeyûmên PKK qeyûmên xwe danîn ser şaredarîyê, serok û girgirekên DEMê wek her care û bi heman şanoyê rabûn ser tapanan û dest bi lotikan kirin. Ev şanoya ku 20-30 sal in dubare, sêbare û çarbare tê kirin, îro jî bi heman armancê tê lîztin û pelûl dîsa bi serê Kurdan de dirije. Ev serok û rêberên ku newêrin yan naxwazin zarokekî xwe derxin kuçe û kolanan, dîsa dixwazin zarokên Kurdên reben û xwelîser di kuçe û kolanan de ji berjewendîyên xwe û dewletê re bikin goştê ser savarê, yan wan bidin girtin, yan bidin kujtin, yan berê wan bidin çiyê, yan jî wan terk û dinya bikin.
Qeyûma DEMê Tulay Hatimogullari, li Mêrdînê, ji bo şermezarkirina danîna qeyûman axavtinek balkêş kir û carek din eşkere kir ku ew qeyûma dewletê ye û ne jib o xêra Kurdan bûye hevserok.
Hatimogullari çi got hûn zanin?
Got:
“AKP û MHP ne partiyên Tirk in; Ev partîyên hizbî ne. Astengîya herî mezin a li pêşîya Tirkîyeyîbûnê tifaqa AKP û MHP ye. Divê bi vî awayî bê zanîn“.
We fêhm kir bê dibê çi ne?
Yanî dibêje, “AKP û MHP (Erdogan û Bahçelî) ji me re dibin asteng û nahêlin ku em Kurdan bi Tirkîyê ve pîne bikin, nahêlin em wan bikin Tirk û Tirkîyeyî“.
Helbet xanimê Ereb rast dibêje. Ji xwe erk û armanca hemû qeyûmên ku tên ser serê Kurdan ev e, Tirk û Tirkîyeyîkirina Kurdan.
Lê ne sûc û gunehê van qeyûman e. Wek min li jor jî got, heta em ev xwelîser û ehmeq bin, heta em ev pez û garan bin, wê hê gelek qerase têkevin me wesselam…
Mêrdîn
Dîko qezenc kir, Jin, Jîyan, Azadî têk çû
Çima hûn îstîfa nakin heval?
CHP bi şeş telaqên jinberdanê sûnd xwar û got: Pirsgirêka Kurd heye!